HUI AGM

Karekau e pau ngā mihi mo te hui AGM a te Poari Māori o Tūhoe-Waikaremoana i tū ki Te Whai o te Motu Marae i Ruatāhuna i te tīmatanga o tēnei tau. Kō atu i te 100 ngā mema i tae mai. Ahakoa te āwangawanga a ētahi mo te take kua ono tau kē mai te putanga o ngā rīpoata pūtea, kua tau ngā wairua ināianei nā te mea kua whakaritea e te poari kia tirohia ngā pūtea, kia tuhia he ripoata, a kia tāpirihia atu ki te ipurangi Annual Report 2009 Ka mau te wehi!

Ki runga

He ‘taonga’ te Poari

Ko tā te Heamana a Te Toka Tēmara ki te hui AGM : He aha tā koutou hiahia mo te Poari? He aha ngā mahi me mahia ? Me pēhea te hanga o te Poari a ngā rā kei mua? Me hono rānei te Poari ki tētahi atu mana, hei te tutukitanga o ngā kereme? Ko te whakaaro kotahi i rongohia kia kaua e moumouhia ngā pukenga a te Poari mai ngā tau 50 ki muri. Hei tā ngā kaumātua, me ‘pō takoto’, i runga i te whakapono ‘he tāonga te Poari’, ā kei te haere tonu ngā kōrero. He aha ōu whakaaro?

Ki runga

Te Hui ki Rūātoki

Ko te hui o Kohi-tātea i tū ki te marae o Waikirikiri i Rūātoki, ā i noho tuwhera ki te katoa. I taetae mai ngā pāpara me ngā kuia arā ko Te Uru McGarvey mā (kei rō whakaahua) Mary Williams me Rangi Puke (kei rō whakaahua), Hōri Thrupp, Frank Vercoe, Wycee Harawira me Pēpē MacDougall. Koinei tētahi o ngā tikanga a te Poari kia whai waahi ngā mema whaanui ki ngā hui, kia noho maarama ai ki ngā nekeneke me ngā whakahaere a te Poari.

Ki runga

Rīpoata, Te Kotahi a Tūhoe

I te hui i Waikirikiri ka tū a Tāmati Kruger ki te whakamaarama mai i ngā nekeneke mo ngā kereme kei mua i te Rūnanga Whakamana i te Tiriti. Ko ngā take nui ko te ahu pēhea o te 212,000 heketea o te Urewera me te wāriu o te whakaeatanga. Ko te īnoi a ngā kaiwhirihwiri kōrero kia hoki mai a Te Urewera ki a Tūhoe. Kei te tatari ināianei kia hoki mai te Karauna me taana whakataunga hou, kia whai waahi ai tātou ki te whakautu. A te wā ka rongo tātou mai te Karauna me te whakapono anō kei te pai rawa te haere o ngā whakawhitiwhiti kōrero.

Ki runga

Tono Tahua Whakapakari

Ko te rauna tuatahi mo ngā tono Pūtea Whakapakari a te Poari kua tuwhera ināianei tae noa atu ki te 31 o Poutū te Rangi 2010. Ko ngā roopu pakihi-kore anake ka taea te tono mo ēnei moni. Karekau e tautokohia ngā tono takitahi me ngā roopu tākaro.  I mua o te tono me pānui ngā tikanga tahua a te Poari me tirohia anō ngā marau pakihi me ngā mātāpono a te Poari, tirohia ngā whārangi 2 &3.  Me whakakī rawa i ngā pepa tono a te Poari, mai i te tari mai te ipurangi rānei www.tuhoe.iwi.nz/grants Mo ētahi atu mōhiotanga imeera ki a anne@tuhoe.iwi.nz.

Ki runga

Tono Pūtea Matauranga 2010

Anei ngā wā tuwhera me te katinga o ngā tono pūtea mātauranga a te Poari mo te tau 2010. Mo ngā kura tuatahi ka tuwhera 26 Huitanguru ki te 2 o Paenga Whāwhā. Kura Tuarua 31 o Poutū te Rangi ki te 30 o Pipiri. Tohu Paetahi/ Tauira ka tuwhera 31 Poutū te Rangi ki te 28 Haratua. Tauira Matua/Tohu Tākuta 30 Hongongoi ki te Mahuru. Kei runga ngā pepa tono i te ipurangi www.tuhoe.iwi.nz/grants.

Ki runga

Ahu Whenua

E waru ngā Tarahiti Ahu Whenua, 15 ngā Paparehia kei raro i te mana whakahaere a te Poari o Tūhoe-Waikaremoana Māori, mo ngā kaiwhiwhi rawa. Ko te Poari anō kei te titiro ki ngā mahi e mahia ana, ki ngā whakahaere pūtea me te mana o ngā Tarahiti me ngā paparehia nei. Ko te nuinga hoki karekau he moni e kuhu mai ana, na te mea i hangaia na ngā ture a te Kooti Whenua Māori. Kotahi rau ngā poraka whenua kei roto i ngā paparehia. Ko te nuinga he maramara whenua noa iho ēngari ko ētahi he waahi tapu tonu. Kaare anō ētahi kia whakawhitihia ki ngā kaipupuri e ora tonu ana. Ēngari kei te mahitahi te Poari me te Kooti Whenua Māori ki te whakamāmā i ngā huarahi e taea ai te whakawhiti i ngā Tarahiti nei ki ngā kaipupuri tika. Kua whakaritea e te Poari kia tū he hui AGM mo ia Tarahiti. (Ahakoa karekau tēnei i te tikanga i raro i te ture, ko te hiahia a te Poari mā ēnei hui ka taea te rīpoata ki ngā kaipupuri, ka taea anō e ngā kaipupuri te whakatakoto i ō rātou hiahia ki ngā kaiwhiwhi rawa). A te wā ka taea atu pea te pānui ki a koe, mo tētahi hui AGM mo te Tarahiti. Tirohia mai te ipurangi www.tuhoe.iwi.nz.

Ki runga

He Tohu mo tetahi pakihi Tūhoe

Akenepea he tohu ao mo te kamupene a Joe Doherty (kei rō whakaahua) ko Te Urewera Treks. Hei tā ngā tirohanga a te International Indigenous Tourism & Biodiversity, kua whai wāhi tēnei kamupene ki te whiwhi tohu, mā te wā ka kitea mena he hua ka puta. Ka whakawhiwhia te tohu ki te whenua o Tiamana a tēnei tau. Ko Te Urewera Treks ka mau turuhi ki ngā ara hikoi o Te Urewera me Whirinaki ki waenga ngahere podocarp me te beech. www.teureweratreks.co.nz. A te wā ka puta ētahi atu mōhiotanga mo te Rēhita Pakihi a Tūhoe me ōna painga katoa, kia tūhono a Ngai Tūhoe ki a Ngai Tūhoe.

Ki runga